المشهد السادس

المشهد السادس
(حنتور، نجيبة، كواكب، ريري، ميمي، فيفي)
حنتور:
لازِمْ نِتْصَرَّفْ.. الْحَالِه مَا عَادِتْ تِنْطَاقْ.. وَسَائِلْ الإِعْلاَمْ عَمْ بِتْشَرْشِحْنَا كِلّْ يَوْم.. وْنِحْنَا سَاكْتِينْ..
نجيبة:
أَفْضَلْ شِي نْأَلِّفْ وَفِدْ مِنْ بَعْض الشَّخْصِيَّاتْ اللُّبْنَانِيِّي وِنْقَابِلْ رَئِيسْ الْوُزَرَا.. بَرْكِي بْيِقْدِرْ يْحِلّ مَشَاكِلْنَا مَعْ الْبُولِيسْ وْمَعْ الإِعْلامْ الأُسْتْرَالِي..
كواكب:
فِكْرَه مِمْتَازِه يا مامي.. بَسّ مُشْ رَحْ تِعْطِي نَتِيجِه..
نجيبة:
وَاللَّه مَعِكْ حَقّ.. مِنْ هَـ الإِجْتِماعاتْ.. مَا بْتِطْلَعْ غَيْر الصُّوَرْ التِّذْكَارِيِّه..
فيفي:
بْتَعِرْفُوا لَيْشْ.. لأَنّ الْوَاحِدْ مِنَّا مَا بِيمَثِّلْ إِلاَّ حَالُو.. فِيكُنْ تْقُولُولِي مِينْ مِنْ أَفْرَادْ الْعِصَابَاتْ رَحْ يِسْمَعْ كِلْمِتْنَا.. نِحْنَا بْوَادِي وِالزِّعْرَانْ بْوَادِي..
ريري:
مْبَارِحْ اجْتَمَعْنَا مَعْ وَزِيرْ الْبُولِيسْ.. نِصّْنَا غِفِي بِالإِجْتِمَاعْ.. وْلَوْلا الْعَيْبْ كَانْ الْوَزِيرْ طَرَشْنَا بِالْمَيّْ..
ميمي:
بَسّ الإِجْتِمَاعْ كَانْ إِجْتِمَاعْ أَكِلْ..
ريري:
مظْبُوطْ.. وْقَدّ مَا أَكَلْنَا نِمْنَا..
فيفي:
يِعْنِي مَا حَدَا فَتَحْ تِمُّو.. مَا حَدَا طِلِعْ صَوْتُو..
ريري:
فِي مِنُّنْ فَتْحُوا تِمُّنْ هِنِّي وْنَايْمِينْ.. وْفِي مِنُّنْ طِلِعْ صَوْتُنْ هِنِّي وْعَمْ بِيشَنِخْرُوا..
حنتور:
وِالْخَواجَه أَسْعد.. رَئِيسْ تَحْرِيرْ جَرِيدْة النُّورْ مَا فَتَحْ تِمُّو؟
ريري:
فَتَحْ تِمُّو.. بَسّْ كِلُّنْ سَكّتُوهْ.. كِلُّنْ طِلْعُوا ضِدُّو.. قَامْ انْسَحَبْ مْنِ الإِجْتِمَاعْ..
نجيبة:
الْحَمْدِللَّه الْـ طِلِعْ حَدَا بِتْهِمُّو مَصْلِحْةِ الْجَالْيِه.. يِخْرُبْ بَيْتُنْ مَا بِتْهِمُّنْ إِلاَّ مَصِلْحِتُنْ..
حنتور:
الْمَسْؤُولِينْ هَوْنْ مِتِلْ الْمَسْؤولِينْ هَوْنِيكْ.. مَا فِي أَشْطَرْ مِنُّنْ بْتِمْسِيحْ الْجُوخْ..
نجيبة:
شِي بِيضَحِّكْ.. آخْرِتْنَا سَوْدَا بْهَالِبْلادْ.. صَارِتْ سِمْعِتْنَا زِفْتْ
حنتور:
وْشُو لازِمْ نِعْمِلْ؟.. كِيفْ لازِمْ نْخَلِّصْ عْيَالْنَا؟
نجيبة:
عَنْ طَرِيقْ الْبَيْتْ.. وْعَنْ طَرِيقْ الْمَدْرَسِه.. لِمِّنْ بْيِتْعَاوَنْ الْبَيْتْ مَع الْمَدِرْسِه بْيِظْبُط الْمُجْتَمَعْ..
حنتور:
والله يا نَجيبه.. نِحْنا ما عْرِفْنا رِبَّيْنا.. طِلْعُوا بْناتْنا مايْعينْ.. وْمُشْ عارْفِينْ لَوَيْنْ رَحْ يُوصَلُوا.. نجيبة:
جَهْلِه زْغِيرِه وِبْتِمْرُق.. بْحَلّفَكْ بالأَرْبَعْ بْنات يا حَنْتُور.. إِنْت ما جْهِلْت؟
حنتور:
جْهِلْت.. بَسّ مُشْ هَالْقَدّ..
نجيبة:
إِي سْكُوتْ.. سْكُوتْ.. هَلَّقْ بْيِسْمَعُوكْ وْما بِيعُودْ فِيكْ تْخَلِّص مْن لْساناتُنْ..
(يدخل أبو جرجي وهو يحمل خزنته على ظهره، تتجمّع حوله البنات)
كواكب:
شُو بَاكْ يَا بُو جِرْجِي.. هَيِئْتَكْ حامِلْ الْخَزْنِه عَ ضَهْرَكْ؟
أبو جرجي:
مُشْ عَارِفْ وَيْنْ بَدِّي خَبِّيهَا.. خَايِفْ يِسِرْقُوهَا الزِّعْرَان وْتِزْعَلْ مِنِّي إِمّ جِرْجِي..
فيفي:
بَسّ تِذْكُرْ إِسِمْ إِمّ جِرْجِي.. لازِمْ تْقُولْ: أَلَّلـه يِرْحَمَا..
أبو جرجي:
صَرْلِي مِدِّه زِعْلاَنْ مِنَّا.. قِلْتِلاَّ تِعْمِلِّي وَاسْطَه مَعْ رَبّْنَا بَرْكِي بْيَاخِدْنِي لْعِنْدَا.. أَللَّه وَكِيلْكُنْ لا تْحَرّكِتْ وْلاَ فَتْحِتْ تِمَّا.. الظَّاهِرْ مَغْرُومِه فَوْق بْشِي وَاحِدْ غَيْرِي..
كواكب:
لا تْقُولْ هَيْكْ يَا بُو جِرْجِي.. كِلّ وَاحِدْ بِيمُوت بْوَقْتُو..
أبو جرجي:
أَنَا مَا بَدِّي مُوتْ.. بَدِّي إِطْلَعْ لْعِنْد إِمّ جِرْجِي.. لابِسْ تْيَابِي.. مْلَمَّعْ صِبَّاطِي.. وْحَامِلْ خَزِنْتِي..
ريري:
إِذَا مَا مِتّ.. كِيفْ بَدَّكْ تِطْلَع لْعِنْدْ إِمّ جِرْجِي يَا بُو جِرْجِي؟..
أبو جرجي:
مِتِلْ مَا طِلِعْ سْمِيِّي مَارْ الْيَاسْ.. شُو نْسِيتُو إِنُّو أَنَا إِسْمِي الْيَاسْ؟..
ميمي:
مَا فِيكْ تِطْلَعْ مِتِلْ مَارْ الْيَاسْ..
أبو جرجي:
شُو قَصدِك يِعْنِي؟.. أَنَا مُشْ آدْمِي.. أَنَا ما بْصَلِّي؟
ميمي:
الْبَرْكِه فِيكْ.. آدَمِي كْتِيرْ وْبِتْصَلِّي أَكْتَرْ..
أبو جرجي:
وْلَيْشْ مَا فِيِّي إِطْلَعْ؟.. شُو نَاقِصْنِي؟..
ميمي:
مُشْ حَاسِسْ إِنَّك تْقِيلْ شْوَيّْ..
أبو جرجي:
تْقِيلْ؟.. أَنَا تْقِيلْ؟.. فِيكُنْ تْقُولُوا شُو مْتَقّلْنِي؟
ميمي:
اللِّي بْيِحْمِلْ عَ ضَهْرُو هَيْكْ خَزْنِه.. شُو بِيكُونْ؟
أبو جرجي:
تِقِبْرُونِي رَيْتْكُنْ.. هَيْدِي خَزْنِه فَاضْيِه.. مَا فِيهَا إِلاَّ صُورِةْ إِمّْ جِرْجِي..
كواكب:
وْلَيْش فِزْعَانْ عْلَيْهَا.. وْمُشْ عَارِفْ وَيْن بَدَّكْ تْخَبِّيهَا؟
أبو جرجي:
سْمِعِتْ فِي حَرَامِيِّه كْتِيرْ بْهَالْجَالْيِه، خِفِتْ يِسِرْقُوا صُورِةْ إِمّ جِرْجِي..
فيفي:
وْشُو بَدُّنْ يِعِمْلُوا بْصُورِةْ إِمّْ جِرْجِي؟
أبو جرجي:
بِيبِيعُوهَا لِلْمَدَارِسْ تَا يْفَزّعُوا فِيهَا الِوْلادْ..
ريري:
عَمْ تِمْزَحْ وِلاَّ عَمْ تِحْكِي جَدّْ؟
أبو جرجي:
عَمْ إِمْزَحْ يَا تِقِبْرُونِي.. عَمْ إِمْزَحْ.. أَنَا خَايِفْ يْبِيعُوا بِرْوَازَا.. دْفَعِتْ حَقُّو مِنْ دُونْ جِي أَسْ تِي تْلاتْ مِيةْ دُولارْ..
كواكب:
إِمّ جِرْجِي مَاتِتْ مِنْ سِتّْ سْنينْ.. رُوحْ شِفْلَكْ شِي وِحْدِه غَيْرَا وِتْجَوَّزْ..
أبو جرجي:
وْمِينْ بَدُّو يَاخِدْنِي بَعِدْ هَالْكَبْرَه يَا حَسْرَه؟..
ميمي:
إِذَا بْتِصْبُغْ شَعْرَكْ.. أَنَا بَاخْدَكْ..
أبو جرجي:
إِنْتِي لْسَانِكْ طَوِيلْ.. مَا بَدِّي يَاكِي..
فيفي:
وْأَنَا مِنْ شُو بِشْكِي يَا بُو جِرْجِي؟ انْشَاللَّـه عَ ذَوْقَكْ؟
أبو جرجي:
إِنْتِي بِتْقَصّرِي فِسْتَانِكْ.. كَمَانْ مَا بَدِّي يَاكِي..
ريري:
مَا بْيِلْبَقْلَكْ غَيْرِي أَنَا.. شُو رَأْيَكْ يَا بُو جِرْجِي؟
أبو جرجي:
إِنْتِي مْنِيحَه كْتِيرْ.. بَسّ إِمِّكْ نَجيبِه فَحُّوشْ فَحّوشْ فَحّوشْ يَا سَاتِرْ
كواكب:
لَيْكْ يَا بُو جِرْجِي.. أَنَا حِسَّاسِه كْتِيرْ.. تْطَلَّعْ فِيِّي مْنِيحْ قَبِلْ مَا تِفْتَحْ تِمَّكْ.. شُو رَأْيَكْ بْهَالشَّمْعَه؟
أبو جرجي:
هَالشَّمْعَه بِتْدُوبْ بْسِرْعَه.. بِدِّي وِحْدِه تْضَايِنْ أَكْتَرْ مِنْ إِمّ جِرْجِي..
كواكب:
أَللَّـه يْلَحّقَكْ فِيَا.. مَاتِتْ عُمْرَا 75 سِنِه.. قِدَّيْشْ بَدَّكْ يَاهَا تْعِيشْ؟
ريري، ميمي، فيفي:
يَا بُو جِرْجِي.. يَا بُو جِرْجِي
عْيُونِي فِرْجِه.. خْدُودِي فِرْجِه
قَلْبِي لْقَلْبَكْ عَمْ بِيقُولْ:
أَنَا خَرْجَكْ.. وْإِنْتَ خَرْجِي
أبو جرجي:
لْحَقِينِي يَا إِمّْ جِرْجِي.. هَجْمُوا عْلَيِّي بْنات حَنْتُور وْنَجيبِه..
(يهرب أبو جرجي، تلحقه البنات، يدخل يوسف وفادي وفارس)
فادي:
شِفْتُوا هَالْخَزْنِه الْحَامِلاَ بو جرجي عَ ضَهْرُو؟.. لازِمْ نِسْرِقَا..
فارس:
لا تْعَذِّبْ قَلْبَكْ.. مَا فِيهَا إِلاَّ صُورْة الْمَرْحُومِه إِمّ جِرْجِي..
فادي:
شُو عَمْ تِحْكِي يَا زَلَمِي.. كِلّ هَالْخَزْنِه مَا فِيهَا إِلاَّ صُورِةْ الْمَرْحُومِه؟.. الظاهِر عَم تِمْزَح مَعِي؟
فارس:
وْلَوْ بِتْشُوفْ شُو صَابْنِي لِمِّنْ فَتَحْتَا.. كَانُوا هَرُّوا سْنَانِي مْنِ الْفَزَعْ.. طِلْعِتْ بْوِجِّي صُورِةْ إِمّ جِرْجِي وِصْرَخْتْ.. صَارْ صَوْتِي أَعْلَى مِنْ صَوْتْ جهاز الإنْذار.. هُوِّي يْزَلْغِطْ وْأَنَا زَلْغِطْ..
فادي:
قَهْ.. قَهْ.. قَهْ..
(يلتفت إلى يوسف)
شُو بَاكْ يَا يُوسِفْ.. نِحْنا عَمْ نِضْحَك وْإِنْتَ مْكَشَّرْ.. فِيكْ تْقِلِّلي بْشُو عَمْ بِتْفَكِّرْ؟
يوسف:
عََمْ فَكِّرْ بْإِمِّي.. طُولْ اللَّيْل رَاكْعَه تْصَلِّي.. يَا رَبّ حْمِيلِي يُوسِفْ.. وْبَعِّدْ عَنُّو الزّعْرَانْ..
فارس:
لَهْ يَا إِمّ يُوسِف لَهْ.. عَمْ بِتْقُولِي عَنَّا زِعْرَانْ؟..
فادي:
أُمّ يُوسِفْ رَبِّتْ يُوسِفْ
طِلِعْ أَزْعَرْ يَا إِخْوَانْ
غَشِيمِه.. بَعْدَا مَا بْتَعْرِفْ
إِنُّو إِبْنَا مْنِ الزِّعْرَانْ
يوسف:
خَلَصْ.. خَلَصْ.. خَلَصْ.. مَا بِسْمَحِلْكُنْ تِضْحَكُوا عَ إِمِّي..
فادي:
إِنْت الْعَمْ تِضْحَكْ عَ إِمَّكْ.. مُشْ نِحْنَا..
يوسف:
مَعْكُنْ حَقّْ.. كِلّ لَيْلِه بِكْذُبْ عْلَيْهَا وِبْقِللاَّ: أَنَا رَايِحْ عَ الشِّغِلْ.. وبَدَلْ مَا رُوحْ عَ الشِّغِلْ بِجِي مَعْكُنْ عَ السِّرْقَه، وعَ بَيْع الْحَشِيشِه..
فارس:
وْعَ الْبَنَاتْ.. شُو نْسِيتْ الْبَنَاتْ الْجَمِيلاَتْ الشَّقْرَاوَاتْ الْعَيُّوقَاتْ؟
يوسف:
وْكِيفْ بَدِّي إِنْسَى.. شُو كِنَّا مْنِعْمِلْ لَوْ عِمْلُوا بْخَيَّاتْنَا مِتِلْ مَا عَمْ نِعْمِلْ نِحْنَا بِبْنَاتْ النَّاسْ؟!
فادي:
لَيْكْ.. إِمَّكْ مُشْ عَارْفِه إِنَّكْ بِتْحَشِّشْ؟..
فارس:
أَكِيدْ مُشْ عَارْفِه.. إِمُّو مَرَا آدْمِيِّه بِتْفَكِّرْ كِلّ النَّاسْ أَوَادِمْ..
فادي:
إِيْ حَشِّشْ يَا حَبِيبْ إِمَّكْ حَشِّشْ..
يوسف:
الْحَقّْ عْلَيْكْ إِنْتْ.. لِمِّنْ عْمِلْتَكْ صَاحْبِي انْتَزْعِتْ حَيَاتِي..
فادي:
أَنَا عْمِلْتَكْ زَلْمِي.. الْفَرْدْ عَ خَصْرَكْ وْعَمْ بِتْسُوقْ مَرْسِيدِسْ.. لَوْلايِي مَا كَانْ فِيكْ تْسُوقْ دَبِّه..
يوسف:
عَمْ بِلْعَنْ السَّاعَه اللِّي تْعِرَّفِتْ فِيهَا عْلَيْكْ..
فادي:
سِدّ بُوزَكْ.. قِلْتِلَّكْ سِدّ بُوزَكْ.. أَنَا اللِّي عْمِلْتَكْ.. أَنَا اللِّي غْنِيتَكْ.. أَنَا اللي صِيَّرْتَكْ..
(يسحب مسدسه)
فارس:
ضِبّْ فَرْدَكْ يَا سَامِي.. اللُّبْنَانِي مَا بْيِسْحَبْ فَرْدُو بْوِجّْ صَاحْبُو..
فادي:
هَيْدَا مُشْ لُبْنَانِي.. مِدْرِي مِنْ أَيَّا بْلادْ عَرَبِيِّه وْعَامِلْ حَالُو لُبْنَانِي.. وْفِي مِتْلُو وِمْتَالُو كْتِيرْ.. وْكِلّ مَا يِرْتِكْبُوا جَرِيمِه بْيِلِزْقُوهَا فِينَا..
فارس:
شو.. شو.. شو.. إِنْتْ أَزْعَرْ وِلاَّ مُنَاضِلْ وَطَنِي.. وِحْيَاتَكْ مِنْ هَلَّقْ وْرَايِحْ مِنْقِلُّنْ يْسَمُّونَا عِصَابَاتْ عَرَبِيِّه..
فادي:
كِلّ شِي وْلا عِصَابَات عَرَبَيِّه.. سَاعِتْهَا مِنْصِيرْ مِتْل الدُّول الْعَرَبِيِّه.. مَا حَدَا بْيِحْكِي مَعَ التَّانِي..
فارس:
بِمَا إِنُّو الْعِصَابَاتْ مَا إِلْهَا وَطَنْ.. وْدَايْماً بِدُون هَوِيِّه.. لازِمْ يْسَمُّونَا عِصَابَاتْ وْبَسّ..
يوسف:
يْسَمُّوكُنْ شُو مَا بِيسَّمُوكُنْ.. أَنَا مُشْ فِرْقَانِه مَعِي..
فادي:
وْلِكْ سْكُوتْ.. طِلَّعْتِلِّي خِلْقِي.. الْعَمَى شُو بِتْنِقّْ..
فارس:
بََدَلْ مَا نِتْخَانَقْ.. رُوحُوا تَا نِسْرُقْ كِمّ سِيَّارَه وِنْبِيعُنْ فَرْطْ..
يوسف:
لَيْكْ مِينْ عَمْ يِحْكِي لَيْكْ.. الظَّاهِرْ مَا تْرِبَّيْتْ..
فارس:
لَيْشْ شُو عْمِلْت تَا إِتْرَبَّى؟..
يوسف:
جِرَّبِتْ تِسْرُقْ سِيَّارِةْ هِيُونْدَايْ جْدِيدِه مَا بِتْدُورْ إِلاَّ بِالْمِفْتَاحْ.. قِمْتْ حْمِلْتَا بِالتّْرَاكْ تَبَعَكْ.. وْصَاحِبَا نَايِـمْ فِيهَا..
فارس:
وْشُو عَرَّفْنِي إِنُّو نَايِمْ فِيهَا؟.. لَوْ مَا إِنْزِلْ بْجُورَه وْيِخْبُطْ رَاسُو بِالسّقَفْ مَا كَانْ فَاقْ..
فادي:
إِنْتَ وْعَمْ تِرْفَعْ السِّيَارَه مَا سْمِعْتو عَمْ بِيشَنْخِرْ؟
فارس:
يِخْرُبْ بَيْتُو.. كَانْ قَاطِعْ نَفَسْ مِنْ فَوْق وْمِنْ تَحِتْ..
فادي:
وْشُو عِمِلْ حَضْرِةْ جَنَابُو لِمِّنْ فَاقْ؟..
فارس:
طَارْ عَقْلُو.. وْصَارْ يْصَرِّخْ: سْتُوبْ.. سْتُوبْ.. بُولِيسْ.. بُولِيسْ.. وِيْضَوِّي وِيْطَفِّي وِيْزَمِّرْ.. أَللَّـه وَكِيلْكُنْ عَجَقْ الأَرْضْ..
يوسف:
وْشُو عْمِلْتْ إِنْتْ تَا خِلَّصْتْ حَالَكْ؟
فارس:
نْزِلْت مْنِ التّرَاكْ.. وِرْكََضْتْ صَوْبُو وْأَنَا عَمْ إِضْحَكْ وْغَنِّي: تْعِيشْ وْتَاكِلْ غَيْرَا وْصِحّتَكْ بِالدِّنِي.. هَيْدَا بِرْنَامِجْ عَ الفَضَائِيِّه بِيضَحِّكْ كْتِيرْ..
وْصِرْتْ قِللُّو كَمَانْ: بِتْرَجَّاكْ هَوِّي لِلْكَامْرَا الْخَفِيِّه.. وصَارْ يْهَوِّي وِيْهَوّي تَا خِدْرِتْ إِيدُو..
يوسف:
يِعْنِي طِلِعْ لُبْنَانِي..
فارس:
وِبْيَعْرِفْنِي كَمَانْ..
يوسف:
وْشُو قَلَّكْ لِمِّنْ نِزَّلْتِلُّو سِيَّارْتُو عَنِ التّرَاكْ..
فارس:
نَفَخْ صَدْرُو مِتْل الطَّاوُوسْ وْقَللِّي: دَخْلَكْ.. أَيْمَتَى رَحْ يْحِطُّونِي عَ التِّلْفِزْيُون؟
(يضحكون)
فادي:
هْرِبُوا يَا شَبَابْ.. شَايِفْ سِيَّارِةْ بُولِيسْ جَايِي صَوْبْنَا.. يَلاَّ يَلاَّ..

**

اقلب الصفحة من فضلك