المشهد الخامس

المشهد الخامس
(حفلة نجوى كرم، موسيقى، رقص، قنينات مصنوعة من البلاستيك تتطاير في الجوّ أثناء الخناق)
أسعد:
سَيِّدَاتِي.. آنِسَاتِي.. سَادَتِي.. لَحَظَاتْ وَنَكُونُ مَعَ فَنَّانَةِ الْعَصْرْ.. مَعْ مُطْرِبَةْ لُبْنَانْ نَجْوَى كَرَمْ..
حنتور:
هَــــــــــــــا.. يَا أَهْلاَ بِنَجْوَى كَرَمْ.. يا أهلاَ بِالزِّحْلاوِيِّه.. يَا أَهْلاَ.. يَا أَهْلاَ.. يَا أَهْلاَ..
أسعد:
بِتْرَجَّاكْ تِقْعُدْ مَحَلَّكْ.. قَرّبِتْ نَجْوَى تِطْلَعْ..
نجيبة:
زَحْلِه يَا دَارْ السّلامْ.. فِيكِي مَرْبَطْ الأسُودِي.. وْلِكْ يَا أَهْلا بْبِنْت زَحْلِه..
أسعد:
كَمَانْ إِنْتِي يَا مَدَامْ بِتْرَجَّاكِي تِقْعَدِي مَحَلِّكْ..
فيفي:
يَا جَارَةَ الْوَادِي طَرِبْتُ وْعَادَنِي مَا يُشْبِهُ الأَحْلامَ مِنْ ذِكْرَاكِ
ميمي:
وْلِكْ يَا إِخْتِي شُو بِكِي؟!.. لَوْ سِمْعِكْ عَبْدِ الوَهَّابْ كَانْ قَامْ مِنْ قَبْرُو
أبو فارس:
بِاسْمِي.. وَبِاسْمِ زَوْجَتِي أم فارس.. أُرَحِّبُ بِضَيْفَةِ الْجَالِيَةِ الزِّحْلاوِيَّه.. وَالْبِقَاعِيَّه.. واللُّبْنَانِيَّه.. وَالْعَرَبِيَّه.. وَ.. وَ.. وَوَوَوَ
أسعد:
حَاجِي بَقَى تْوَقْوِقْ.. إِذَا بِتْرِيدْ رُوحْ قْعُودْ مَحَلَّكْ..
أبو فارس:
شُو.. مَمْنُوع الْوَاحِدْ يِفْتَحْ تِمُّو بْهَـ الْحَفْلِه؟
أسعد:
فِيكْ تِفْتَحْ تِمَّكْ.. بَسّ مُشْ عَ الْمَيْكْرِفُونْ..
أبو فارس:
مَعَكْ حَقّ.. مَا لازِمْ إِحْكِي عَ الْمَيْكْرِفُونْ.. لازِمْ غَنِّي.. قَدِّمْنِي لِلْجُمْهُورْ بْشِي كِلِمْتَيْن حِلْوِينْ مِتْل شْوَارْبَكْ..
أسعد:
قِلْتِلَّكْ تْرُوكْ الْمَيْكْرِفُونْ وِرْجَاعْ لِمْحَلَّكْ.. الْعَمَى شُو هَـ الْجالْيِه التِّعْبانِه؟!
أبو فارس:
أوفْ.. أُوفْ.. أُوفْ..
أسعد:
الظَاهِرْ مَا بْتِفْهَمْ إِلاّ بِالضَّرِبْ..
(أسعد يضرب أبا فارس)
أم فارس:
يَا مَقْرُودْ.. يَا إِبْن الْمَقْرُودِينْ.. عَمْ تِضْرُبْ جَوْزِي.. خُودْ هَـ السّكَرْبِينِه خُودْ..
أنيس:
وْلِكْ شُو بِكِي ضْرَبْتِينِي أَنَا؟
أم فارس:
صِبْتَكْ بِالْغَلَطْ.. كِنْتْ عَمْ إِضْرُبْ هَـ الْمَقْرُودْ..
فارس:
شُو بَاكْ عَمْ بِتْصَرِّخْ عَ أُمِّي؟
أنيس:
ضَرْبِتْنِي بِالسّكَرْبِينَه.. مُشْ شَايِفْ رَاسِي مْوَرَّمْ؟
فارس:
مَلْيُونْ سْكَرْبِينِه مَا بِتْطَالْ رَاسَكْ هَـ الْـ مِتِلْ رَاس الْبَطاطا..
أنيس:
وْلا.. شُو عَمْ بِتْقُولْ.. أَنَا رَاسِي مِتِلْ رَاسْ الْبَطاطا؟!
فارس:
وْشُو بَدَّكْ يَانِي قِلَّكْ: رَاسَكْ مِتِلْ رَاسْ الْبَطِّيخْ.. إِي رُوحْ يَا حَبِيبْ إِمَّكْ رُوحْ.. رَاسَكْ مْبَلْطَحْ مِتْل رَاسْ الْبَطاطا، وْمُشْ لازِمْلُو إِلاَّ شْوَيِّةْ دْجاجْ وِبْتِطْلَع الطَّبْخَه..
أنيس:
بَدِّي إِشْرَبْ دَمَّكْ.. رِدُّونِي عَنُّو إِذَا فِيكُنْ..
أبو جرجي:
عِلْقِتْ.. هْرِبُوا..
(تتطاير القنينات في الهواء، يضرب أحدهم أبا جرجي على رأسه بالقنينة بطريقة مضحكة)
فريدة:
هَيْئِتْهَا عِلْقِتْ عَنْ جَدّْ.. قُومْ يَا رِجَّالْ قُومْ تَا نِرْجَعْ عَ الْبَيْتْ..
أنيس:
مَا فَشَرْ.. أَنَا يِنْقَالْ عَنِّي جَبَانْ.. إِذَا ضَرْبُوا قَنِّينِه بِضْرُبْ مَلْيُون قَنِّينِه.. وْهَيْدِي أَوِّلْ قَنِّينِه.. يَلاَّ..
(تقع القنينة على رأس ريري)
ريري:
آخْ يَا رَاسِي.. رَاسِي رَحْ يِنِفْجِرْ..
ميمي:
(تفحص رأس أختها)
مَا عَ قَلْبِكْ شَرّْ.. بَدِّكْ سِتّ سَبِعْ قِطَبْ وِبْيِمْشِي الْحَالْ..
سلمى:
يَا جَمَاعَه عَيْبْ.. نِحْنَا جَايينْ نِسْمَعْ نِجْوَى كَرَمْ مُشْ جَايِينْ نِتْخَانَقْ..
يوسف:
إِذَا مَا بَدِّكْ تْخَانْقِي وْقَفِي عَ جَنَبْ.. الْعَمَى شُو بتِتْفَلْسَفْ..
سلمى:
لَيْكْ مِينْ عَمْ يِحْكِي لَيْكْ.. صَرْلَكْ نِصّ سَاعَه يا إبِنْ أُمّ يوسِفْ مِتْخَبَّى تَحْت الطَّاوِلِه.. هَلَّقْ صِرْتْ عَنْتَرْ..
يوسف:
تْطَلَّعِي فِيِّي مْنِيحْ تَا شُوفْ.. عَنْتَرْ وِلاَّ مُشْ عَنْتَرْ؟
سلمى:
إِنْتْ مُشْ عَنْتَرْ.. إِنْتْ زَعْتَرْ..
يوسف:
(يرفع مسدسه بالجو، يعلو صراخ الناس)
عَمْ بِتْقُولِي عَنِّي زَعْتَرْ.. إِي أَللَّـه مَا يْخَلِّينِي إِذَا بْخَلِّيكِي طَيِّبِه..
أبو جرجي:
عِلْقِتْ.. هْرِبُوا..
(تتطاير القنينات في الهواء، يضرب أحدهم أبا جرجي على رأسه بالقنينة بطريقة مضحكة)
سعدى:
الْعَمَى شُو زَمُّورو مِزْعِجْ.. كِلّ نِتْفِه بْيِصْرُخْ عِلْقِتْ اهْرِبُوا.. إذَا بَدُّو يِهْرُبْ يِهْرُبْ لْوَحْدُو.. شُو بَدُّو بْغَيْرُو؟..
كواكب:
آخْ لَوْ بْتِسْمَعِي زَمُّورِكْ إِنْتِي.. أُفْ شُو طَبْقِةْ صَوْتِكْ مِزِعْجِه..
سعدى:
رُوحِي مِنْ وِجِّي أَحْسَنْ مَا إِنْتِفْلِكْ هَالْكَمْ شَعْرَه الْبَاقْيِه بْرَاسِكْ..
كواكب:
مْأَكَّدْ إِمِّكْ مِتْوَحّمِه عَ شِي ضِفِدْعَه.. وَاقْ.. وَاقْ.. وَاقْ..
سعدى:
إِي هَلَّقْ عِلْقِتْ عَنْ جَدّ.. أَنَا ضِفِدْعَه أَنَا.. أَنَا وَاقْ وَاقْ.. لْسَانِكْ أَطْوَل مِنْ صِرْمَايْتِكْ وْمَا بْتِسْتِحْيِي..
أبو جرجي:
عِلْقِتْ.. هْرِبُوا..
(تتطاير القنينات في الهواء، يضرب أحدهم أبا جرجي على رأسه بالقنينة، بطريقة مضحكة)
رمزا:
وَيْنُو جَوْزِي.. حَدَا مِنْكُنْ شَفْلِي جَوْزِي؟..
ميمي:
إِذَا بْتِعْطِينِي أَوْصَافُو.. مَعْقُول لاقِيلِكْ يَاهْ..
رمزا:
لْسَانُو طَويلْْ مَا بْيِسْكُتْ.. وْكِرْشُو كْبِيرْ قَدّ الْبَرْمِيلْ.. وْلابِسْ قَمِيصْ حَمْرَا..
ميمي:
عَريف الْحَفْلِه جَوْزِكْ؟!.. إِيْ رُوحِي لِمِّيهْ مِنْ تَحْت الإِجْرَيْنْ.. كِلُّنْ عَمْ بِيدَرِكْبُوه عَ الأّرْضْ..
رمزا:
وْلِكْ كِيفْ عَمْ بِيدَرِكْبُوهْ عَ الأَرْضْ.. هَلَّقْ بْيِتْجَعْلَكْ قَمِيصُو..
نجيبة:
بَدَلْ مَا تْقُولي هَلَّقْ بْيِفْقَعْ وْبِيرَوِّحْلُو مِيةْ قَتِيلْ.. خِفْتِي يِتْجَعْلَكْ قَمِيصُو..
رمزا:
أَنَا الْـ عَمْ غَسِّلْ.. أَنَا الْـ عَمْ إِكْوِي.. اَنَا الْـ عَمْ جَلِّي.. أَنَا حَرَّه قُولْ الْـ بَدِّي قُولُو..
ميمي:
وْأَنَا بَدِّي فِشّ خِلْقِي.. أَنَا بَدِّي رَبِّيكِي.. أَنَا ما خِلِقْ مِينْ يِرْفَعْ صَوْتُو عْلَيِّي..
أبو جرجي:
عِلْقِتْ.. هْرِبُوا..
(تتطاير القنينات في الهواء، يضرب أحدهم أبا جرجي على رأسه بالقنينة، يقع أرضاً، وحوله بعض الجرحى، يدخل الإسعاف، يحمل الجرحى. تدخل بعض النسوة)
أم يوسف:
شُو هَيْدَا؟.. شُو هَيْدَا؟.. حَرَبْ أَفْغَانِسْتَانْ مَا تَرْكِتْ أَضْرَارْ هَـ الْقَدّْ!!
أم فارس:
ما بَعْرِفْ شُو صَابْنا يا أمّ يوسِفْ.. الشَّيْطانْ رِكِبْ رَاسْنا وْما عِدْنا نْشُوفْ إِلاَّ الشّر..
فريدة:
انْتِبْهُوا تِدْعَسُوا عَ الِقْزَاز.. أُفْ شُو مْكَسّرِينْ قْنَانِي وِيسْكِي وْبِيرَه
أم يوسف:
يَا حَرَامْ.. فِي نَاسْ تَرْكُوا صُورَنْ عَ الأَرْضْ وْهَرْبُوا.. لَيْكُوا هَـ الصُّورَه كِيفْ مِلْيَانِه دَمّْ..
فريدة:
نِحْنَا شَعبْ مَا بْيَعْرِف يِنِبْسِطْ.. عَقِلْنَا بْرَاسْ مِنْخَارْنَا.. وْمِنْهِبّ مِتْل الْبَارُودْ..
أم يوسف:
بَعِدْ هَيْدَا وْكِلُّو.. لا تْقُولُولِي غَنِّتْ نَجْوَى كَرَمْ؟
أم فارس:
وْكِيفْ بَدَّا تْغَنِّي وْمَا ضَلّْ حَدَا إِلاَّ وْمَا فَاتْ عَ الْهُوسْبِتَالْ..
فريدة:
أَنَا لَوْ كِنْت مْحَلاَّ.. بْزُورْ الْجِرْحَى وِبْغَنِّيلُنْ.. مَا هِنِّي هَيْكْ وْهَيْكْ دَافْعِينْ حَقّ البطاقات..
أم يوسف:
بَدَلْ مَا تِضْحَكُوا لازِمْ تِبْكُوا.. جِينَا عَ هَـ الِبْلادْ وْجِبْنَا الْمَشَاكِلْ مَعْنَا.. فِيكُنْ تْقُولُولِي لَيْشْ تْرَكْنَا بْلادْنَا؟.. وِبْإِيدْ مِينْ تْرَكْنَا بْلادْنَا؟.. صَدّقُونِي، نِحْنَا مَا طْلِعْنَا أَوَادِمْ.. لا بْلُبْنَانْ عْرِفْنَا نْعِيشْ.. وْلا بْأُسْتْرَالْيَا عْرِفْنَا نْعِيشْ.. صِرْنَا شَعبْ ضَايِعْ.. قُولوا أَللَّـه.
(تخرج أم فارس وفريدة. أم يوسف تغني على لحن أغنية فيروز: دخلك يا طير الوروار)
قَلْبِي يَا يُوسِفْ عَ نَارْ
لا تْخَلِّي فِكْرِي مِحْتَارْ
رِبَّيْتَكْ.. تَا صِرْت كْبِيرْ
كَمِّلْ يَا إِبْنِي الْمِشْوَارْ
خَلِّيهَا دْرُوبَكْ مِضْوِيِّه
وْبِالْغُرْبِه بْيُوتَكْ تِعْمَرْ
كِرْمَالَكْ سِهْرِتْ عِينَيِّي
حَتَّى رَبِّيكْ وْتِكْبَرْ
خَلِّيكْ كْبِيرْ
تَا قَلْبِي يْطِيرْ
يَا حبيبي..
(يدخل يوسف وكأنّه يستطلع آثار الخناق)
يوسف:
إِمِّي.. مِينْ جابِكْ لْهَوْن؟.. مْبَيَّنْ بَعْدِكْ فَايْقَه؟!..
أم يوسف:
جِيتْ مَعْ جارِتْنا.. قَالُولي إِنّك كِنْت بِالْحَفْلِه، خِفْت لَتْكُونْ مِنْ بَينْ الْجرْحى..
يوسف:
لَيْش أَنا طِفْل زْغِيرْ تَا تْخافِي عْلَيِّي؟
أم يوسف:
وْخَبّرونِي إِنَّكْ شَارَكْت بِالْحَرْب الأَهْلِيِّه.. وْإِنَّك سْحَبِتْ فَرْدَكْ عَ حِرْمِه.. وِعْمِلت عْمايِلْ عَنْتَر ما عِمِلْها..
يوسف:
حِرْمِه لْسَانَا طَويلْ.. سَبِّتْني وْسَبّتِكْ، قِمْت رْفَعْت صِرْمايْتِي عْلَيْها، فَكّرُوها فَرْد..
أم يوسف:
وْشُو بَدّنا بِالِمْشاكِلْ يا يُوسِفْ، ما عَ الِحْسَابْ كِنْت رَايِحْ عَ شِغْلَكْ!
يوسف:
طْلَبتْ إِذنْ مْنِ "الْبُوصْ"، وْقِلتْ بِجِي عَ حَفْلِةْ نَجْوَى كَرَمْ.. شُو عْملْت جَريمِه يا أُمّي؟
أم يوسف:
النّاسْ عَمْ تِحْكي كْتيرْ يا إِبْني.. يَا رَيْتْ بِتْلاقيِلَكْ شِي شَغْلِه بِالنّهَارْ بَرْكِي بْقِصّ لْسَانَاتْ النَّاسْ..
يوسف:
وْنِحْنَا شُو بَدّنَا بِالنَّاسْ؟.. النَّاسْ ما عِنْدُنْ شَغْلِه إِلاَّ يِتْسَلُّوا فِينا.
أم يوسف:
مَعَكْ حَقّ يَا إبْنِي.. مَعَكْ حَقّ.. دَخْلَكْ إِنْت شُو بْتِشْتِغِل بْهَـ اللَّيْلْ؟..
يوسف:
أَنا.. أَنَا شُو بِشْتِغِلْ؟..
أم يوسف:
إِيْ يَا يُوسِفْ.. إِنْت شُو بْتِشْتِغِلْ؟
يوسف:
بِشْتِغِلْ.. أَنا بِشْتِغِلْ كَرْسُونْ بْمَطْعَمْ..
أم يوسف:
وْكَرْسُونْ الْمَطْعَمْ بيسُوقْ مَرْسِيدِسْ مْنِ الْوَكَالِه؟
يوسف:
صَارْ الْوَقْتْ مْأَخَّر وْأَنَا نِعْسَانْ كْتِيرْ..
أم يوسف:
مَا جَاوَبِتْنِي عَ سُؤالِي يَا يُوسِفْ؟..
يوسف:
قِلتِلِّكْ أَنَا نِعْسَانْ كْتِيرْ.. يَلْلاَّ تا نِرْجَعْ عَ الْبَيْت يا أمّي..
أم يوسف:
بْرَضَايِي عْلَيْك يَا إِبْنِي.. لا تْمَرْمِغْ شَيِبْتِي بِالْوَحِلْ.. جِينَا عَ الْغُرْبِه تَا نْعِيشْ كْبَارْ.. وْلازِمْ نْعِيشْ كْبَارْ..

**

اقلب الصفحة من فضلك