المشهد الرابع

المشهد الرابع
(رئيس تحرير جريدة النور وزوجته)
رمزا:
سْمَعْنِي مْنِيحْ.. عَمْ قِلَّكْ سْمَعْنِي مْنِيحْ.. نِحْنَا بْأُسْتْرَالْيَا مُشْ بْلِبْنَانْ.. بَدِّي إِسْهَرْ لْوَحْدِي سَاعِةْ مَا بَدِّي.. وِالْمُشْ عَاجْبُو يْبَلِّطْ الْبَحْرْ..
أسعد:
يَا مَرَا.. نِحْنا جَمَاعَه مِنْشَافِينْ، عِنَّا جَرِيدِه، عِنَّا عَيْلِه، عِنَّا وْلادْ لازِمْ نْرَبِّيهُنْ..
رمزا:
وْلادْنَا كِبْرُوا مَا عَ قَلْبُنْ شَرّْ.. لا تْخَافْ عْلَيْهُنْ مُشْ رَحْ يَاكِلُنْ الضَّبُعْ..
أسعد:
إِبْنِكْ أنور بَدَلْ مَا يِدْرُس تَا يِنْجَحْ بِالشّهَادِه.. عَمْ بِيرُوح يِسْهَرْ مَعْ أَصْحَابُو وْيِرْجَعْ سِكْرَانْ..
رمزا:
مَا حَدَا سِكْرَانْ غَيْرَكْ.. فِيكْ تْقِلّلي مِنْ شُو عْيُونَكْ حِمِرْ ..
أسعد:
مِنْ قِلّةْ النَّوْمْ.. كِلّ لَيْلِه بُوقَفْ عَ الشِّبَّاكْ وِبْصِيرْ إِتْطَلَّعْ بْهَـ اللَّيْلْ وْأَنَا عَمْ صَلِّي: يَا رَبّ رِدِّلِي مَرْتِي وإِبْنِي بْخَيْرْ..
رمزا:
نِحْنَا بْخَيْر بَسّ نْكُونْ بْعَادْ عَنَّكْ..
أسعد:
بِنْتِكْ كَمَانْ مَا عَادِتْ تِتْهَدَّى.. بِتْضَلّْ قَاعْدِه عَ الإِنْتِرْنِتْ طُول اللَّيْلْ.. أَللَّه بْيَعْرِف مَعْ مِينْ عَمْ تِحْكِي..
رمزا:
فِيكْ تْحِلّ عَنْ ضَهْرَا وْضَهِرْنَا بَقَى..
أسعد:
شي بيضَحِّكْ.. كِنْت إِكْتُبْ بِالْجَريدِه عَنْ مَصَايِب النَّاسْ.. صَارْ بَدِّي مِينْ يِكْتُبْ عَن مْصِيبْتِي! رمزا:
خَازُوقْ فِيكْ وِبْجَريدْتَكْ.. بَعْدَكْ دَقَّه قَدِيمِه ما بْيِنْعاشْ مَعَكْ..
أسعد:
لَوْ ما كِنَّا رايْحِينْ عَ حَفْلِةْ نَجْوَى كَرَمْ، وْلَوْ ما كانْ مَحْسُوبِكْ بَدُّو يْقَدِّمْ الْحَفْلِه، كِنْت تْرَكْت الْبَيْت، وِارْتَحْت مِنْ هَـ الْخِلْقَه الْمَنْحُوسِه..
رمزا:
وْكِنْت قِلْتِلَّكْ بِالصَّوْت الْعَالي: مَعْ أَلْف سَلاَمِه. الْعَمَى مَا أَغْلَظْ الرِّجَّالْ بَسّ يِعْمِلْ رِجَّالْ..
(يخرج أسعد ورمزا، تدخل أم فارس وأبو فارس)
أم فارس:
أَنَا مِتْزَوّجِه كِذَّابْ.. زَوْجِي يَا عَالَـمْ بْيِقْرُط الْكِذْبِه مِنْ هَوْن لْتِرْكِيَّا.. وْبَدُّو يَانِي صَدّقُو..
أبو فارس:
عَيْب يَا مَرَا.. هَلَّقْ بْيِسْمَعُونَا الْجِيرَانْ..
أم فارس:
وْلِكْ يِسْمَعُونَا.. بَرْكِي بْيَعِرْفُوكْ عَ حَقِيقْتَكْ..
أبو فارس:
قِلْتِلِّكْ وَطِّي صَوْتِكْ.. رَحْ نِتْجَرَّصْ..
أم فارس:
فِيكْ تْقِلِّلِي أَيَّا سَاعَه وْصِلْتْ عَ الْبَيْتْ مْبَارِحْ؟
أبو فارس:
السَّاعَه تْلاتِه الصُّبْحْ..
أم فارس:
فِينِي أَعْرِفْ لَيْشْ تْإِخَّرْتْ هَـ الْقَدّْ؟
أبو فارس:
انْبَخَشْ دُولابْ التّرَانْ..
أم فارس:
لَيْش دُولابْ التّرَانْ بْيِنِبْخِش؟..
أبو فارس:
هَـ التّرَان بِالذَّاتْ طِلِعْ حَظُّو مِتِلْ حَظِّي، قَامْ انْبَخَشْ دُولابُو..
أم فارس:
دُولابْ التّرَانْ حَدِيدْ مَا بْيِنِبْخِشْ..
أبو فارس:
كَانُوا مْرَكّبِينْلُو بِالْغَلَطْ دُولابْ كَاوِتْشُوكْ..
أم فارس:
رُوحْ شِفْلَكْ كِذْبِه غَيْرَا..
أبو فارس:
طيِّبْ.. كِنْت سِهْرَانْ بِالْكَازِينُو..
أم فارس:
مِتْلِ الْعَادِه يَا بُو سْعَادِه.. خْسِرْت كِلّ مِصْرِيَّاتَكْ..
أبو فارس:
وْحَقّ اللّـه، الْمَرَّه التَّانْيِه بَدِّي إِرْبَحْ.. وْبَدِّي عَوِّضْ كِلّ خْسَارْتِي..
أم فارس:
خْسَارْتَكْ كْبِيرِه كْتِيرْ صَعْبْ تِتْعَوَّضْ.. رُوحْ فَتِّشْلَكْ عَنْ مَرَا غَيْرِي..
أبو فارس:
وِوْلادِي وَيْنْ بِتْرُوحِي فِيهُنْ؟
أم فارس:
فارِسْ صارْ رِجَّال فيكْ تْشُوفُو ساعِةْ ما بَدَّكْ.. أَمَّا الزّغارْ ما بِسْمَحْلَكْ تْشُوفُنْ إِلاَّ كِلّ جُمِعْتَيْن مَرَّه.. بْخَاطْرَكْ يَا قِمَّرْجِي..
أبو فارس:
بْعَرْضِكْ سْمَعِينِي.. ارْجَعِي لْهَوْنْ.. شُو نْسِيتي إِنُّو رَايْحِينْ نِسْمَعْ نَجْوَى كَرَمْ؟..
أم فارس:
وْبَسّ تِخْلَصْ حَفْلِةْ نَجْوَى بَدِّي إِخْلَصْ مِنَّك وْمِنْ كِذْبَكْ.. فْهِمْتْ؟
أبو فارس:
فْهِمِتْ وَاللّـه فْهِمِتْ.. يِرْحَمْ بَيّ اللّي قَالْ: عَقْل الْمَرَا بْكَعْب سَكَرْبِينِتَا..
(يخرج أبو فاري وأم فارس، يدخل أنيس وفريدة)
أنيس:
شُو هَـ الْجَخّ.. شُو هَـ الْجَخّ.. بِتْصَدّقِي مَا شِفْتِكْ شُو لابْسِه لِمِّنْ طْلِعْتِي بِالسِّيَّارَه.. قَمَرْ وَاللَّه قَمَرْ..
فريدة:
يَلّلي عْيُونُو حِلْوِينْ بِيشُوفْ كِلّ شِي حِلُو..
أنيس:
انْشَاللَّـه نِيَّمْتِي الِوْلادْ.. وْسَكَّرْتِي الْبَابْ مْنِيحْ؟
فريدة:
وْقِلْتِلُّنْ مَا يِفْتَحُوا لْحَدَا تَا نِرْجَعْ مْنِ السّهْرَه.. حَفْلِةْ نَجْوَى كَرَمْ مَا بْتِتْفَوَّتْ..
أنيس:
انْشَاللَّـه تْطْلَعْ مِتِلْ حَفْلِةْ رَاغِبْ عَلامِه وْأَلِيسَا.. مَالِيسَّا.. مَا بَعْرِفْ شُو إِسْمَا..
فريدة:
شُو مَا كَانْ إِسْمَا يْكُونْ.. لَيْلِتْهَا.. عَيْنِي مَا قِمْتَا عنْ رَاغِبْ عَلامِه..
أنيس:
وْأَنَا هَيْكْ.. عَيْنِي مَا قِمْتَا عنْ أَلِيسَّا.. شَقْفِه.. وْحَقّ أَللَّـه شَقْفِه..
فريدة:
قَوْلَكْ الِوْلادْ عَمْ يِهِرْبُوا مْنِ الشّبَابِيكْ بَسّ نِحْنَا نِضْهَرْ؟..
أنيس:
لَيْش عَمْ بِتْقُولِي هَيْكْ؟..
فريدة:
كِلّ مَا نِرْجَع مِنْ حَفْلِه بْلاقِي الشّبَابِيكْ مْفَتّحَه.. وْفِي دَعْسَاتْ تَحْت الشّبَابِيكْ..
أنيس:
هَلَّقْ عَمْ بِتْقُولِيلِي.. لَيْش مَا قِلْتِيلِي مِنْ قَبْل؟
فريدة:
خِفْت تْبَطِّلْ تَاخِدْنِي عَ السَّهْرَه..
أنيس:
كِرْمَالْ لَيْلِه بْتِخِرْبِي الْعَيْلِِه.. وْلادْنَا ضَاعُوا يَا مَرَا.. أَنَا رَاجِعْ عَ الْبَيْتْ..
فريدة:
وْنَجْوَى كَرَمْ وَيْن بِتْرُوحْ فِيهَا؟.. يَا رَيْتْنِي مَا فْتَحِتْ تِمِّي.. بَدِّي إِسْهَرْ.. بَدِّي فَرْفِشْ.. مَا فِيكْ تْنَيِّمْنِي مَع الدّجَاجْ..
أنيس:
بَدِّي نَيّمِكْ حَدّ وْلادِكْ.. تَا مَا يْعُودُوا يِهِرْبُوا مْنِ الشّبَابِيكْ.. مَشِّي قِدَّامِي عَ الْبَيْتْ..
فريدة:
مُشْ رَحْ إِمْشِي..
أنيس:
قِلْتِلِّكْ مَشِّي عَ الْبَيْتْ..
فريدة:
مَا فَشَرْتْ.. بَدِّي إِسْمَعْ نَجْوَى وْشُوفْ شُو لابْسِه..
أنيس:
وْأَنَا بَدِّي شُوفْ وْلادِي..
فريدة:
أَللّـه مَعَكْ.. خُودْ تَاكْسِي وِتْرِكْلِي السَّيَّارَه..
أنيس:
لْحِدّ هَوْنْ قَلْبِكْ قَاسِي عَ وْلادِكْ..
فريدة:
(تصرخ)
نَجْوَى.. نَجْوَى.. نَجْوَى...
أنيس:
(يصرخ مثلها)
وْلادِي.. وْلادِي.. وْلادِي..
فريدة:
إِذَا بْتِرْجَعْ عَ الْبَيْت وِبْتِحْرِمْنِي السَّهْرَه بَدِّي إِحِرْمَكْ مِنُّنْ..
أنيس:
وَاللّـه بْتِعِمْلِيهَا..
فريدة:
وْبِعْمِلْ أَبُوهَا..
أنيس:
عَمْ تِمْزَحِي وِلاَّ شُو؟
فريدة:
بْهَيْك قِصَصْ.. أَنَا مَا بِمْزَحْ..
أنيس:
فَإِذَنْ.. مَا إِلْنَا إِلاَّ..... نَجْوَى..
فريدة:
بْتِعْجِبْنِي كْتِيرْ كْتِيرْ.. لأَنَّكْ رِجَّالْ..
أنيس:
وْإِنْتِي بْتِعِجْبِينِي كْتِيرْ كْتِيرْ.. لأَنِّكْ إِخْت الرِّجَالْ..
**

اقلب الصفحة من فضلك