المشهد الثالث

المشهد الثالث
(سلمى تبكي بصوت عالٍ، أشبه ما يكون بالصراخ، وفريدة تطيّب خاطرها)
فريدة:
لَيْشْ عَمْ تِبْكِي يَا سَلْمى؟.. خَلَصْ بَقَى.. رَوّقِيهَا بِتْرُوقْ..
سلمى:
بَيِّي تَرَكْ الْبَيْتْ وْرَاحْ.. وْأَنَا بْحِبّ بَيِّي..
فريدة:
لا تْخَافي.. بُكْرَا بْيِرْجَعْ..
سلمى:
مُشْ رَحْ يِرْجَعْ.. عِنْدُو وِحْدِه تَانْيِه غَيْر إِمِّي.. وْبَدُّو يِتْزَوَّجَا..
فريدة:
بَسّ إِمِّكْ حِلْوِه كْتيرْ.. وْبَعْدَا صَبِيِّه..
سلمى:
بَطَّلْ يْحِبَّا لأَنَّا سَمْرَا.. قَالْ هُوِّي بِيحِبّ الشِّقِرْ..
فريدة:
وَيْن كَانُوا عْيُونُو قَبِلْ مَا يِتْزَوَّجَا وِيْخَلِّفْ مِنَّا نِصّ دَزِّينِةْ وْلادْ..
سلمى:
أَيَّا نِصّ دَزِّينِه أَيَّا بَلُّوطْ.. صَارُوا فَرِيقْ فُوتْبُولْ كَامِلْ..
فريدة:
صَحِيحْ وَاللَّـه.. إِمِّكْ بِتْخَلِّفْ بِالسِّنِه مَرّتَيْنْ.. وِدْفَعِي يا حْكُومِةْ أُسْترَالْيا..
سعدى:
أَنَا لْقَيْتْ الْحَلّْ..
سلمى:
هَاتِي سَمّعِيني يَا ذَكِيِّةْ عَصْرِكْ..
سعدى:
تَا يِرْجَعْ بَيِّك لإِمِّكْ لازِمْ تِصْبُغْ شَعْرَا.. مَا فِي أَكْتَرْ مْنِ الصَّبْغَه بْهَـ الِبْلادْ.. وْمَا فِي أَرْخَصْ مِنْها كَمَانْ.. سِعْرَا بْسِعْر الْفِجِلْ..
فريدة:
فَإِذَنْ.. أَحْسَنْ شِي تْقُولي لإِمِّكْ تِصْبُغْ شَعْرَا.. بِتْفُوتْ عَ الْحِمَّامْ سَمْرَا بْتِطْلَعْ شَقْرَا..
سلمى:
يا حَرامْ عَ الْمامي، غِلْطِتْ مَرَّه وْصَبْغِتْ شَعْرَا، صَارْ بَيِّي يْقِلاَّ: يَا حِرْبَايِه، مُشْ لابِقْلِكْ شَعْر الأَشْقَرْ..
سعدى:
وَالله مَعِكْ حَقّْ، مَرَّه إِمِّي صَبْغِتْ شَعْرَا.. صَارْ لَوْنُو مِتِلْ لَوْن الْبَطَاطَا.. قَلْلاَّ بَيِّي: إِذَا كَانِتْ الْبَطَاطَا الْـ عَ رَاسِكْ طَازَه.. قْلِيلْنَا شِي فَوْجْ.. أَللَّه يْخَلِّيكِي.. نِحْنَا جُوعَانِينْ..
(تخرج فريدة، يدخل فادي وفارس)
فادي:
مَرْحَبَا يَا بَنَاتْ.. آخِرْ مَرَّه رِقَّصْنَاكُنْ فِيهَا قِمْتُوا غْلِبْتُونَا.. وْهَلَّقْ جَايِينْ نَاخُدْ بْتَارْنَا.. جَاهْزِينْ..
سلمى:
رُوحُوا رْقِصُوا مَعْ غَيْرْنَا.. نِحْنَا مَا بَدّنَا نِرْقُصْ..
فادي:
دَعِسْ عَنْ رَقْبِتْكُنْ بَدّكُنْ تِرِقْصُوا.. الْجَبَانْ وَحْدُو اللِّي بْيِهْرُبْ..
فارس:
مُشْ هَيْك بْيِحْكُوا مَعِ الْبَنَاتْ.. هَيْدِي لُغِّةْ شَوَارِعْ..
فادي:
سَمِّعْنِي لُغّتَكْ تَا شُوفْ..
فارس:
يَا بَنَاتْ.. يَا حِلْوِينْ.. يَا أَحْلَى زَهْرَاتْ سِيدْنِي.. بِتْحِبُّوا تِغِلْبُونَا بِالرَّقْص مَرَّه تَانْيِه..
فادي:
لأْ.. مُشْ رَحْ يِغِلْبُونَا..
سلمى:
مْبَلَى.. بَدّنَا نِغْلِبْكُنْ.. دَوِّرْ الِمْسَجْلِه تَا شُوفْ..
(موسيقى غربيّة راقصة، الشباب والبنات يتبارون بالرقص)
فادي وفارس:
غْلَبْنَاكُنْ.. غْلَبْنَاكُنْ.. غْلَبْنَاكُنْ..غْلَبْنَاكُنْ....
سلمى:
مَا بَقَى نِرْقُصْ مَعْكُنْ.. إِنْتُو لِبْنَانِيِّي زِعْرَانْ.. مَا حَدَا بِيحِبّكُنْ..
فادي:
وْإِنْتُو لُبْنَانِيِّي أَوَادِمْ.. يَلَّلا.. يَلَّلا.. حِلُّوا عَنْ ضَهِرْنَا بَقَى.. مِلاَّ بَنَاتْ..
فارس:
سْمِعْت شُو قَالُوا عَنَّا الْبَنَاتْ؟ نِحْنَا لُبْنَانِيي زِعْرَانْ..
فادي:
بْتَعْرِفْ لَيْشْ؟.. لأَنْ إِهْلُنْ بِيقُولُوا هَيْكْ.. وْلأَنّ الْبُولِيسْ بِيقُولْ هَيْكْ.. وْلأَنّ الْجَرَايِدْ بِتْقُولْ هَيْكْ..
فارس:
عَ فَيْقَه.. إِجِتْ إِمّ يُوسِفْ لْعِنْدِي وْسَأْلِتْنِي عَنْ يُوسِفْ.. شُو بْيِشِتْغِلْ؟.. وَيْنْ بِيرُوحْ؟.. وْمَعْ مِينْ بْيِسْهَرْ؟.. عْمِلْتْ حَالِي مَا بَعْرِفْ شِي.. مِتْل الأَطْرَشْ بِالزَّفِّه..
فادي:
إِيَّاكْ تْقِلّلاَ إِنُّو تاجر حَشِيشِه.. بْتِنْقِطِعْ رِزْقِتْنا..
سلمى:
سْمِعْتَكْ شُو عَمْ بِتْقِلّو عَنْ يُوسِف.. هَيْك عِصَابَاتْ الْبُولِيسْ مَا بِيشُوفَا.. هَيْدِي بْيِقْبَضْ مِنْها.. بِيعَبِّي جَيِبْتُو.. بَسّ إِذَا وِقْفُوا أَرْبَعْ شَبَابْ لُبْنَانِيِّي بِالشَّارِعْ بِيقُولْ عَنُّنْ لِيبَانِيزْ غَانْغ..
سعدى:
نِحْنَا صَحِيحْ لِيبَنِيزْ.. بَسّ خِلْقَانِينْ بْأُسْتْرَالْيَا وْمَا مْنَعْرِفْ لُبْنَانْ.. نِحْنَا أُسْتْرَالِيِّي مَا مْنَاكُلْ إلاَّ الْهَمْبِرْغِرْ.. عَيْب يْشَرِشْحُوا إِسْم الْجَالْيِه اللِّبْنَانِيِه كِلّ مَا لَقْطُوا واحد أَزْعَرْ..
سلمى:
إِي يْحِلُّوا عَنْ ضَهِرْنَا بَقَى.. نِحْنَا لا مْنِسْرُقْ وْلا مْنِقْتُلْ وْلا مِنْحَشِّشْ.. نِحْنَا ضِجْرَانِينْ وْبَدّنَا نِتْسَلَّى..
سعدى:
هَلَّقْ شُوفوا.. بَعِدْ خَمْس دْقَايِقْ بْيِجِي الْبُولِيسْ.. وْبِيصِيرْ يِتْغَالَظْ عْلَيْنَا.. بَسّ هَـ الْمَرَّه مُشْ رَحْ نِسْكِتْلُو.. وْشُو مَا بَدُّو يْصِيرْ يْصِيرْ..
فادي:
(يهمس بأذن فارس)
عْمالْ حالَكْ آدْمِي.. هَوْدِي لْسانُنْ طَويلْ..
فارس:
إِذَا شِفَّطْنَا بِالسِّيَارَه.. بِيقُولُوا عَنَّا لِيبنِيزْ غَانْغْ..
فادي:
وْإِذَا نِفَّخْنَا شِي سِيكَارَه.. بِيقُولُوا عَنَّا لِيبنِيزْ غَانْغْ..
فارس:
وْإِذَا تْمِشَيّْنَا بِالْحَارَه.. بِيقُولُوا عَنَّا لِيبنيزْ غَانْغْ..
فادي:
وْإِذَا مْزَحْنَا مَعْ خِتْيَارَه.. بِيقُولُوا عَنَّا لِيبَنِيز غَانْغْ..
فارس:
وْإِذَا تْطِلَّعْنَا بِالْجَارَه.. بِيقُولُوا عَنَّا لِيبَنِزْ غَانْغْ..
سعدى:
قَوْلَكُن.. فِي لِيبَنِيزْ غَانْغْ؟
سلمى:
فِي أَوْ مَا فِي.. نِحْنَا شُو خَصّنَا.. نِحْنَا شَبَابْ قَاعْدِينْ عَ (الدُّول).. مَا قِدْرِتْ الدَّوْلِه تْلاَقِيلْنَا شِغِلْ.. وبَدّنَا نِتْسَلَّى.
فادي:
صَرْلِي سِنْتَيْنْ عَمْ دَوِّرْ عَ شغل وْمُشْ عَمْ لاقِي.. الْحَالِه تِعْبَانِه بْهَـ الْبَلَدْ..
سعدى:
صَدّقْني فِي شِغْل كْتِيرْ.. بَسّ إنْت مَا بَدَّك تشْتِغِلْ..
فادي:
إِذَا كَانْ الشِّغِلْ مُشْ عَ ذَوْقِي، مُشْ رَحْ إِشْتِغِلْ، الْمِصْرِيَّاتْ الْـ عَمْ بِيجُونِي بِيكَفُّونِي.. أَكْتَرْ مِنْ هَيْكْ مَا بَدِّي..
سلمى:
الظَّاهِرْ مُشْ نَاوِي تِتْزَوَّجْ؟
فادي:
أَكِيدْ بَدِّي إِتْزَوَّجْ.. بَسّْ إِمِّي مُشْ عَمّ بِتْخَلِّينِي.. قَالْ بَدَّا تْجِبْلِي بِنْتْ خَالْتِي مِنْ لُبْنَانْ..
فارس:
لَيْشْ إِنْتْ بْتَعْرِفْ بِنْتْ خَالْتَكْ؟
فادي:
شِفْتَا بِالصُّورَه.. مَا بِهَا شِي.. بْتِشْبَه إِمِّي مَخْلَقْ مَنْطَقْ..
فارس:
خِرْبِتْ.. خِرْبِتْ.. خِرْبِتْ.. خِرْبِتْ..
فادي:
شُو هِيِّي اللِّي خِرْبِتْ؟
فارس:
خِرْبِتْ بَيْتَكْ وْبَيْتَا.. حَدَا بْيِتْزَوَّجْ عَ الصُّورَه؟.. هَـ البِنْتْ الْـ كِنْتْ عَمْ بِتْرَقِّصَا مِنْ شُو بْتِشْكِي؟.. بِالْقَلِيلِه بْتَعْرِفْ بَضَاعْتَكْ عَ حَقِيقِتْهَا..
فادي:
لَيْشْ بَضَاعْتَكْ أَحْسَنْ؟.. مِينِكْ إِنْتْ تَا تِحْكِي عَ بَضَاعْتِي؟
فارس:
يَا خَيِّي لا تِزْعَلْ.. أَنَا وْإِنْتْ مِنْ نَفْس الْبَضَاعَه.. مَبْسُوطْ..
فادي:
إِذَا كَانْ هَيْكْ اتَّفَقْنَا..
فارس:
بْتِسْمَع مِنِّي.. لا أَنا وْلا إِنْت مْنِصْلَحْ لِلْجَازِه.. إِجْرَيْنَا عَمْ تِكْبَرْ وْرُوسْنَا عَمْ تِزْغَرْ..
فادي:
يِرْحَمْ بَيّ اللِّي قَالْ: خَلِّي الْعَسَلْ بِجْرَارُو.. تَا تِغْلَى أَسْعَارُو..
فارس:
يِسْلَمْ تِمِّكْ يَا إِبِنْ إِمَّكْ.. Give me five
سلمى:
مَشِّي يا سَعْدى مَشِّي.. حَرامْ نْضَيِّعْ وَقِتْنا مَع هَيْك شَبابْ..
فادي:
أللَّه مَع دْواليبْكُنْ.. ملاَّ بَناتْ.. رُوحْ تا نْشُوف وَيْنُو يُوسِف..
(يخرج الجميع)

**

اقلب الصفحة من فضلك