المشهد الأول

المشهد الأول
( أم يوسف وأم فارس تستمعان إلى نشرة الأخبار)
صوت راديو:
نشرةُ الأخبار، نقرأُها عليكم من إذاعة2SB :
سيدني: عُيِّنَتْ السيِّدَةُ مَارِي بَشِيرْ زَوْجَةُ السِّيرْ نِيك شْحَادِه حَاكِماً عامّاً عَلَى وْلايَةِ نْيُو سَاوْثْ وِيلْزْ..
مالبورن: انْتُخِبَ السيِّدُ سْتِيفْ بَرَاكْسْ رَئِيساً لِوِلايَةِ فِيكْتُورْيَا، وَقَدْ وَعَدَ سُكَّانَ وِلايَتِه بِالسَّهَرِ عَلَى رَاحَتِهِمْ..
سيدني: قال أحدُ رجالِ الشرطةِ الكبارْ: إن العصاباتِ اللبنانيّةَ تسرحُ وتمرحُ في سيدني، دونَ أنْ تُحَرِّكَ الْجاليَةُ اللّبنانيّةُ سَاكناً.. أو أن تَعْملَ شيئاً منْ أجلِ الْحدِّ مِن نَشاطِ هذهِ العِصَابات.
أم يوسف:
سْمِعْتِي.. سْمِعْتِي يَا إِمّ فَارِسْ.. سْتِيفْ بَرَاكْسْ وْمَارِي بَشِيرْ مَا قَالُوا عَنُّنْ لِبْنَانِيِّي.. بَسّْ الْعِصَابَاتْ اللِّي مْفَزّعَه الْبُولِيسْ.. رَأْساً لَزْقُوهَا فِينَا..
أم فارس:
وْشُو بَدِّكْ يْقُولُوا: عِصَابَاتْ أُسْتُرَالِيِّه؟.. لَيْكْ وَيْنْ بَعْدِكْ لَيْكْ.. شِفْتِي هَـ الْعِصَابَاتْ الْـ عَمْ يِحْكُوا عَنَّا.. الْبُولِيسْ عَمْ بيخَافْ مِنَّا..
أم يوسف:
وْلِكْ شُو هَـ الْبُولِيسْ اللِّي بْيِفْزَعْ مِنْ كَمْ صَرْصُورْ؟!.. خَمِسْ سِتّْ زِعْرَانْ.. خِلْقَانِينْ هَوْنْ، مُشْ سَامْعِينْ بْلِبْنَانْ، وْلا بْيِحْكُوا عَرَبِي، وْبَدُّنْ يِلِزْقُونَا يَاهُنْ .. إِي هَيْدِي أَللَّـه مَا قَالاَ..
أم فارس:
بَسّْ هَوْدِي وْلادْنَا يَا إِمّ يُوسِفْ..
أم يوسف:
هَوْدِي وْلادِكْ إِنْتِي يَا عَيْنِي مُشْ وْلادِي.. أَنَا وْلادِي أَوَادِمْ..
أم فارس:
وْأَنَا وْلادِي أَوَادِمْ..
أم يوسف:
إِذَا كَانُوا وْلادِكْ أَوَادِمْ.. لَيْشْ عَمْ تِتْبَنِّي هَـ الْـ كَمْ أَزْعَرْ؟!
أم فارس:
أَنَا مُشْ عَمْ إِتْبَنَّاهُنْ.. أَنَا قَصْدِي قُولْ إِنُّو أَصْلُنْ مِنْ عِنَّا.. يِعْنِي مِنْ شَعِبْنَا..
أم يوسف:
شَعِبْنَا؟!.. هَيْدَا شَعِبْنَا.. سْتِيفْ بَرَاكْس.. مَارِي بَشِيرْ.. وْكِلّ هَـ النَّاسْ الْخَايْفِينْ أَللَّـه.. الْـ عَمْ يَاكْلُوا لِقْمِتُنْ بْعَرَقْ جْبِينُنْ.. آخْ مِنَّكْ يَا شَعِبْنَا.. بِبْلادَكْ تْبِهْدَلْتْ وْبِالْغُرْبِه تْبِهْدَلْتْ.. مَا ضَلّ حَدَا مَا بَلّ إِيدُو فِيكْ.. انْشَاللَّـه بْتِدْعَسْ رُوسُنْ.
أم فارس:
لازِمْ نْقِيمْ دَعْوَى عَ الْبُولِيسْ.. وِنْفَهّمُو إِنُّو اللِّبْنَانِيِّي مَا حَدَا بْيِدْعَسْ عَ دَنْبُنْ..
أم يوسف:
لَيْشْ نِحْنَا عِنَّا دْنَابْ يَا إِمّ فَارِسْ؟!.. وَيْنُو دَنْبِكْ؟.. فَرْجِينِي دَنْبِكْ..
أم فارس:
وْلِكْ حِلِّي عَنِّي بَقَى.. هَيْدِي كِلْمِه تِنْقَالْ..
أم يوسف:
نِحْنَا وْلادْ قُدْمُوسْ.. وْلادْ الْحَضَارَه.. نِحْنَا بَشَرْ.. مُشْ حَيَوَانَاتْ فَالْتِه..
أم فارس:
أَنَا قَصْدِي غَيْرْ هَيْكْ يَا إِمّ يُوسِفْ..
أم يوسف:
شُو مَا كَانْ قَصْدِكْ يْكُونْ.. لِمِّن بْتِحْكِي عَنْ شَعْب لُبْنَانْ لازِمْ تْبَخّرِي تِمِّكْ..
أم فارس:
تَا نِفْتِرِضْ إِنُّو إِبْنِكْ يُوسِفْ، لا سَمَحْ أَللـه، وَاحِدْ مِنْ هَـ الْعِصَابَاتْ شُو بْتِعِمْلِي؟
أم يوسف:
أَصْلاً مَا كَانْ لازِمْ تِسْأَلِي هَـ السُّؤَالْ.. إِبْنِي يُوسِفْ، أَللَّـه يْشِيلْ مِنْ عُمْرِي وِيْحِطّْ فَوْقْ عُمْرُو، مَاشِي دِغْرِي مِتْل التّرَانْ.. مَا بِيزِيحْ عَنْ سِكّتُو.
أم فارس:
أَنَا عَمْ قُولْ: تَا نِفْتِرِضْ..
أم يوسف:
لا بَقَى تِفْتِرْضِي.. بَلَّشْ ضَغْطِي يِطْلَعْ
أم فارس:
شُو كِنْتِي بْتِعِمْلِي يَا إِمّ يُوسِفْ؟
أم يوسف:
كِنْت بِقِتْلُو.. بْإِيدِي بِقِتْلُو.. بْصِرْمَايْتِي بِقِتْلُو.. ارْتَحْتِي هَلَّقْ؟
أم فارس:
أَللَّـه يْرَيّحِكْ مِتِلْ مَا رِيَّحْتِينِي..
(تخرج أم يوسف. تدخل سلمى وهي ترقص على صوت موسيقى غربيّة، يتصاعد من آلة تسجيل تحملها بيدها).
سلمى:
هَالُو (أَنْتِي).. كِيفِكْ الْيَوْم؟. مْنِيحَه؟..
أم فارس:
كِنْت مْنِيحَه كْتِيرْ.. بَسّ لِمِّنْ شِفْتِكْ عَمْ تِتْخَلِوْعي مِتْل الْخَوْتَهْ زْعِلْت شْوَيّ..
سلمى:
أَنَا ما كِنْت عَمْ إِتْخَلْوَعْ.. كِنْت عَمْ إِرْقُصْ..
أم فارس:
هَيْدَا رَقِصْ هَيْدَا.. رِزْقَ اللَّه عَ أَيَّامْ زَمَانْ.. كِنْت إِدْبُكْ وْإِمْسِكْ عَ الرَّاسْ.. وْكَانُوا أَهَالِي الضَّيْعَه يْصِيحُوا: يَلْلاَّ يَا حَنِّه.. رْقِصِي يَا حَنِّه..
سلمى:
كِلّ بْلادْ عِنْدَا رَقْصَه شِكِلْ.. وْنِحْنَا هَيْدِي بْلادْنَا.. وْهَيْدِي رَقْصِتْنَا..
أم فارس:
لِمِّنْ شِفْتِكْ عَمْ تِرِقْصِي هَيْك فِكَّرْتِكْ مَجْنُونِه..
سلمى:
وَلَو يَا أَنْتِي.. بِتْقُولِي عَنِّي مَجْنُونِه.. ما أَنَا مِتْلِي مِتْلِكْ!..
أم فارس:
أَنَا مَا كِنْت إِرْقُصْ هَيْكْ.. كِنْت خَلِّي السَّاحَه تْزَلْغِطْ..
سلمى:
إِذَا رْقَصْت مِتْلِكْ.. بْتِرِقْصِي مِتْلِي؟..
أم فارس:
بَدِّكْ يَانِي إِتْخَلْوَعْ مِتْل الْخَوْتَه.. وْبَعِدْ هَـ الْكَبْرَه إِلْبُسْ جُبِّه حَمْرَا..
سلمى:
أَللَّـه يْخَلِّيكِي أَنْتِي.. رَقْصَه زْغِيرِه بَسّْ.. حَابِّي شُوفِكْ عَمْ تِرِقْصِي..
أم فارس:
بَسّ يَا بنْت.. اسْتِحْيِي.. هَلَّقْ بِيشُوفُونا النَّاسْ..
سلمى:
شُو بَدِّكْ بِالنَّاسْ.. إِنْتِي تْطَلّعِي فِيِّي وِعْمِلِي مِتْلِي.. رَقْصَه هَيّنِه كْتِيرْ.. الْوَلْد الزِّغِيرْ بْيِرْقِصَا..
أم فارس:
حِلِّي عَنِّي يَا بِنْت.. الْعَمَى شُو هَـ الِمْصِيبِه الْـ إِجِتْنِي..
سلمى:
أُولْد فَاشِنْ.. أُولْد فَاشِنْ.. أُولْد فَاشِنْ..
أم فارس:
أَنَا أُولْدْ فَاشِنْ أَنَا.. لَيْش ضَلّ فَاشِنْ مَا مَرَقْ عْلَيِّي.. رُوحِي يا بِنْتِي رُوحي بَدِّكْ كْتِيرْ تا تُوصَلِي لْعِنْدي.. صَدَقْ اللِّي قَالْ: هَـ الْجِيلْ هَيْدَا جِيلْ الرُوموتْ كُونْتْرولْ..

**

اقلب الصفحة من فضلك